රසවත් පොඩි වම්බටු කරියක්....

දැන් උත්සව කාලෙත් ලග ලගම එනවනේ ඉතින් අද අපි ගෙනාවෙ පොඩි වම්බටු වලින් හදන රසවත් වම්බටු කරියක්.

අවශ්‍ය ද්‍රව්‍ය 

• හොද දම් පැහැති පොඩි වම්බටු ගෙඩි 8ක්.
• අබ ඇට තේ හැදි බාගයක් 
• මාදුරු ඇට තේ හැදි කාලක් 
• සූදුරු ඇට තේ හැදි කාලක් 
• කරපිංචා කිනිති 3ක්
• සිහින්ව කොටු කපාගත් බී ලූනු ගෙඩි 2 ක් 
• දෙහි ඇඹුල් බින්දු දෙක තුනක්
• එළවළු තෙල් මේස හැදි 6ක්

අඹරාගත යුතු පහේ පේස්ට් එක

• රතුලූනු ගෙඩි 7ක් 
• ඉදුණු තක්කාලි ගෙඩි 2 ක්. හතරට පහට කපාගන්න.
• ඉගුරු අගලක කැබැල්ලක් 
• සුදුලූණු බික් 4ක්
• කජුමද 5ක්
• ගාගත් පොල් කෝප්ප බාගයක් 
• මිරිස් කුඩු තේ හැදි 3ක්
• කොත්තමල්ලි කුඩු තේ හැදි 2ක්
• කහ කුඩු තේ හැදි බාගයක් 
• ලුණු තේ හැදි 1ක්
• සීනි තේ හැදි 1ක්

ඉහත සදහන් ටික බ්ලෙන්ඩරයට දමා තනි පේස්ට් එකක් වන සේ සිහින්ව අඹරා පසෙකින් තබාගන්න.

සාදාගන්නා ආකාරය 

• පොඩි වම්බටු ගෙඩිවල එහි දිග අතට කැපුම් හතරක් දමන්න. ගෙඩිය වෙන් නොවනසේ. 
• දැන් මේ කපාගත් වම්බටු වල කැපුම් පාරවල් අතරින් සාදාගත් පේස්ට් එකෙන් ටික ටික ගෙන දමන්න. ඇතුලට පේස්ට් එක අල්ලන ලෙස දාගන්න. ඉතිරි පේස්ට් ටික වෙනම තබාගන්න.
• දැන් තාච්චියක් ගෙන එයට තෙල් මේස හැදි 6ය දමන්න. තෙල් රත්වෙද්දී අබ දමන්න. අබ පුපුරද්දී එයට සූදුරු සහ මාදුරු දමන්න.
• මාදුරු ඇට පුපුරද්දී එයට කරපිංචා දමන්න. කරපිංචා පුපුරද්දී එයට ලියාගත් ලූනු ටික දමා විනාඩියක් පමණ තෙම්පරාදු කරන්න.
• දැන් මේ තෙලට අපි පේස්ට් එක පුරවාගත් පොඩි වම්බටු ටික දමන්න. තෙලේ හොදින් බැදෙන සේ හැන්දෙන් එවා ටිකක් තද කරන්න. තෙලෙන් හොදට තෙත් කරන්න. ගින්දර මධ්‍යම තරමින් තියාගන්න.
• විනාඩි 5ක් පමණ පිසින්න. දැන් මේ තෙම්පරාදුවට අපි හදාගත් පොල් පේස්ට් එකේ ඉතිරි ටික දමන්න. පරිස්සමින් එය තෙම්පරාදුව සමග මිශ්‍ර කරන්න.
• දැන් ලිපේ දැල්ල ටිකක් අඩුකර පියන වසන්න. පේස්ට් එක හොදින් ඉදී වම්බටු ද හොදින් ඉදෙන තෙක් පිසින්න. විනාඩි 12ක් පමණ යද්දී මේ සියල්ල ඉදී තෙල් කරියේ උඩ වෙන්වී තිබේවි.
• දැන් දෙහි බිංදු ටිකක් ඉස උඩින් අලුත් කරපිංචා කොළ ටිකක් හෝ කොත්තමල්ලි කොළ ටිකක් දමන්න. 
• තවත් පැය බාගයක් පමණ වසා තබා පිලිගන්වන්න.

මේ උත්සව කාලෙ ඔයාලත් හදල අමුත්තන්ට පිලිගන්වන්න කට්ටිය පුදුමත් වෙයි.