කර්ඩ් රයිස් හෙවත් මුදවපු කිරිබත්

නීරෝගී කාන්තාවක් හැමදාම උදේට ආහාරයට ගත යුතු විශේෂිත ආහාරයක් විදිහට තමයි මේ කර්ඩ් රයිස් එහෙමත් නැත්නම් මුදවපු කිරිබත් හදුන්වන්නේ. මේ ආහාරය දකුණු ඉන්දියානු ආහාරයක්. තයීර් සාදම් කියල තමයි මේ ආහාරය හදුන්වන්නේ . දකුණු ඉන්දියානු නිලියන්ගේ ජනප්‍රියතම උදේ ආහාරය තමයි මේ තයීර් සාදම්.

අද අපි කියන්න යන මේ ආහාරය සුපිරි ආහාරයක්. මේ රසවත් තෙම්පරාදු බත හරිම රසවත් අත්දැකීමක් වේවි.

රෙසිපිය දාන්න කලින් පොඩ්ඩක් බලමු නේද මේ රසවත් බත කාන්තාවන්ගේ නීරෝගීකමට කොහොමද බලපාන්නේ කියල.

කාන්තාවකගේ සම්පූර්ණ නීරෝගීකමට බලපාන ප්‍රධානතම හේතු ආහාර ජීර්ණ පද්ධතියේ ඇතිවන සංකූලතායි. සම අවපැහැ ගැන්වීම, සම කළු වීම, සම එල්ලා වැටීම, දෑස් බොර පාට වීම, මළ ටික ටික පිටවීම, මළ පිටකිරීමේදී රුධිරය පිටවීම, බඩ පිපුම, උගුරට ඒම, ඉස්මුරුත්තාව, ගැස්ට්‍රයිටිස්, ආහාර රුචිය නැතිකම, කලන්තය, පණ නැතිකම සහ සම්පූර්ණ ශරීරයේ පණක් නැතිවීම වැනි සුලභ රෝග රැසකට මේ මුදවපු කිරිබත ගුණ බවයි පැවසෙන්නේ.

දවස් 30ක් මේ කිරිබත හැම උදයකම ආහාරයට ගැනීමෙන් ඉහත සදහන් රෝග වලට සහනයක් ලබාගත හැකිවේවි.

කර්ඩ් රයිස් සාදාගැනීමට අවශ්‍ය දේවල්...

• පිසගත් බත් කෝප්ප 2ක්. (බෙරි වන්න තම්බාගන්න.)
• අලුත් රස නොකළ මුදවපු කිරි කෝප්ප 3ක්. (රස නොකළ යෝගට් උනත් ගන්න පුළුවන්)
• අමුමිරිස් කරල් 2 ක් (දිගට කපාගන්න )
• අගලක ඉගුරු කැබැල්ලක් (සිහින්ව ලියාගත් )

තෙම්පරාදුව සදහා අවශ්‍ය දේවල්...

• තෙල් තේ හැදි 2 ක්. 
• අබ තේ හැදි බාගයක්.
• උළුදු ඇට තේ හැදි බාගයක්.
• තෝර පරිප්පු තේ හැදි බාගයක්.
• වියළි මිරිස් කරල් 2 ක්. 
• කරපිංචා කොළ 10ක් පමණ.
• පෙරුම්කායම් කුඩු තේ හැදි කාලක්.
• රස අනුව ලුණු.

සාදාගන්නා ආකාරය...

බත් මුදවපු කිරි සහ ලුණු එකට මුසු කර හොදින් මිශ්‍ර කරන්න. ටිකක් හැන්දේ පිට පැත්තෙන් පොඩිකරන්න. ගොඩාක් පොඩි කරන්නත් එපා. 

දැන් මේ බත් මුදවපු කිරි මිශ්‍රණයට ඉගුරු සහ අමුමිරිස් එකතු කරන්න. පසෙක තබන්න. දැන් නන්ස්ටික් පෑන් එකක් ගන්න. එයට තෙල් තේ හැදි 2ක් දමන්න. තෙල් රත්වීගෙන එද්දී එයට අබ ඇට එකතු කරන්න. අබ ඇට පුපුරද්දී එයට උළුදු ඇට සහ තෝර පරිප්පු ඇට එකතු කරන්න. එය රන්වන් පැහැයට හැරීගෙන එද්දී එයට වියළි මිරිස් කරල් සහ කරපිංචා කොළ එකතු කරන්න. විනාඩියක් බැදගන්න. දැන් මෙයට පෙරුම්කායම් කුඩු එකතු කරන්න. ඒ සමගම ලිප වසා හැකි ඉක්මනින් තෙම්පරාදු මිශ්‍රණය සකසාගත් බත් මුදවපු කිරි මිශ්‍රණයට එකතු කරන්න. දැන් හොදින් මිශ්‍ර කරන්න. ලුණු රසබලා එකතු කරන්න. 

අවශ්‍ය නම් උඩින් ලියාගත් කොත්තමල්ලි කොළ ඉස ආහාරයට ගන්න. මෙසේ සකසාගත් කර්ඩ් රයිස් උණුවෙන්ම හෝ ශීත කර ආහාරයට ගන්න පුළුවන්. 

මේ කර්ඩ් රයිස් කොතරම් ගුණදායකද කියල තේරෙන්නේ දිගටම ආහාරයට ගත්තොත් තමයි.